Praktikaj informoj

Pri JES kaj kronviruso

Ni kiel JES-teamo esperas ke la tutmonda situacio evoluos tiel ke dank’ al progreso kun vakcinado fine de 2021 internaciaj vojaĝoj kaj grandaj eventoj denove estos senprobleme realigeblaj. Pro tio, observante la evoluadon ni daŭrigas la organizadon kaj preparas ĉion kiel kutime.

Tial ni invitas vin aliĝi al JES! Se vi planas partopreni, bonvolu aliĝi! Ni decidis ke en kazo de malaliĝo antaŭ la fino de septembro vi povos rericevi la tutan antaŭpagitan sumon. Tio ebligos al vi propran decidon ĉu vi taksas vian partoprenon sufiĉe sekura por vi.

Informoj pri la aranĝo

Estas konsiderate afable paroli Esperanton dum la aranĝo (paroli Esperanton ekzemple plifaciligas al aliaj homoj aliĝi al via konversacio), sed ne regas strikta “lingva disciplino” kaj vi tute rajtas uzi ajnan lingvon laŭ via plaĉo. Kongrue kun tio vi ne rajtas riproĉi homojn kiuj ne parolas Esperanton.

JES estas dediĉita por la junularo kaj havas riĉan noktan programon. Aliĝante al la aranĝo vi akceptas, ke dum la nokto povas ne esti perfekta silento.