Ne devigi sed instigi

Jen la ĉefa principo de ĉi-jara renkontiĝo, kies programaj proponoj rilatos rekte al la kultura kaj la lingva evoluo dum kreado de io nova kaj nekutima. Ricevos vi do la eblojn memverki novajn tekstojn kun la ŝatataj muzikistoj kaj ilin kunkanti, verki poemojn, lerni filmadon, tradukadon, dancojn, teatrumadon, ludadon de instrumentojn kaj renkontiĝi kun konataj personecoj de la movado por ne tedajn prelegojn aŭskulti, sed diskuti pri la historiaj, kulturaj kaj la movadaj aferoj. Kompreneble ne mankos ludejo, gufujo kaj trinkejo kaj aliaj proponoj por tiuj, kiuj diversforme ŝatas ripozi en la mojosa internacia etoso.

La programo, en kiu ne mankos ankaŭ freŝa rigardo al temo de la vespera, koncerta programo, nun kreiĝas.

Daŭras interparoloj, aperas novaj ideoj – la unuaj programeroj jam antaŭ vi, la aliaj baldaŭ.

Poezia ateliero kun Jorge Camacho

 

 

 

 

 

 

 

 

Unu el la gastoj, kiuj proponos al vi ĉiutagan atelieron “Kiel esprimi sin en Esperanto poezie”, estos Jorge Camacho, kiu diras pri si mem: “Mi estas poeto de l’ naturo, de la obskuro kaj la klaroskuro, de la paseo kaj de la futuro…”. En la programo ankaŭ renkontiĝo kun la poeto, diskutoj pri poezio kaj prezentado de poemoj dum la nokta programo en la gufujo.

Bibliografio de verkoj de Jorge Camacho.

Renkontiĝo kun la muziko kaj arto de Martin Wiese

La programon de la 9-a JES kunkreos ankaŭ Martin Wiese, gitaristo kaj kantisto de Amplifiki, Persone kaj Martin kun kaj sen Talpoj! Arkitekto profesie, muzikisto ŝate, dediĉos al vi sian tempon por ke vi sentu vin privilegiitaj en kontakto kun tiel fama kaj eksterordinara komponisto kaj kantisto de la esperantista movado.

Jonny M. sursceneje kaj ne nur!

Sendube estus strange en Ŝĉecino sen Jonny M., kiu dum pluraj jaroj pasigis la novjaran tempon ĉiam kune kun ni. Ne estos do strange: Jonny M. venos al la JES, kantos inter ni kaj ne nur kantos. Kion signifas “ne nur”? Nu, venu al la JES por trovi respondon al ĉi tiu demando. 🙂

Koncerto kaj ateliero kun Kimo

Ĉu sola, sola, soooola? Sendube ne! Kimo dum la 9-a JES en Pollando prezentiĝos ne nur sola kaj certe, kiel ĉiam, ne mooooola. Inter diversaj proponoj ne nur sono de akordeono, sed ankaŭ ateliero kun Kimo!

Ĉu ni aŭdos denove?

Ĵaz-ateliero kun Melono

Ĉu vi ŝatas ĵazon? Ĉu iam vi provis ne nur aŭskulti sed ankaŭ kanti ĵaze? Nu, mankas tio en la movado, tial dum la JES aperos ankaŭ tiu eblo! Ĵaz-ateliero, kiun kunordigos Melono, kaj al kiu sendube aliĝos ankaŭ aliaj muzikistoj, invitos vin provi vian voĉon ĉe bona muzika ĵaz-akompanado. Ĵazo dum la JES? Kial ne!

Gramatika ateliero kun Bertilo

Bertilo, bandano de Amplifiki, Persone aŭ memstara kantisto, ofte kun Birke, konata estas ankaŭ kiel verkisto de tre praktika lernilo: Plena Manlibro de Esperanta Gramatiko. Kio malfacilas en la simpla gramatiko, ĉu fakte ĝi facilas? Al tiuj kaj al multaj aliaj demandoj vi trovos respondon en la gramatika ateliero kun Bertilo, kie eblos diskuti. Krome, ĉar kial ne, vi aŭdos lin ne nur parolanta pri la lingvaj principoj, sed ankaŭ kantanta.